У маладэчанскім МЕТРО

Чэрвень 30, 2009, Вольга Лясніцкая

(Не на правах рэкламы)
Па асабістых назіраннях і сведчаннях прыезжых, у нашым горадзе адзначаецца даволі высокая колькасць устаноў грамадскага харчавання і выпівання на душу насельніцтва. Чаго не скажаш пра месцы для культурнага адпачынку, куды не страшна прывесці і дзяцей. Аднак існуе ў Маладэчне ўнікальная ўстанова, падобных якой, бадай, няма нідзе ў рэгіёнах. Дзе амаль кожны вечар гучыць жывая музыка. Якасная жывая музыка. У нядзелю 26 чэрвеня ў кавярні МЕТРО было як ніколі многа наведвальнікаў: тут выступалі BOTANIC PROJECT.
 >>

Падзея духоўная

Чэрвень 3, 2009, Ул.інф.

У нядзелю днём на галоўнай вуліцы горада быў перакрыты рух аўтатранспарта. Па Вялікім Гасцінцы ішла вялізная працэсія вернікаў.
У Маладэчне адбылася перэгрынацыя абраза Езуса Міласэрнага і рэліквій благаслаўлёнага ксяндза Міхала Сапоцькі.

 >>

Тут быў Вайцюшкевіч

Красавік 8, 2009, Ул.інф.

У Маладэчанскім драмтэатры 3 красавіка адбыўся канцэрт Зміцера Вайцюшкевіча.
Імпрэза была часткай усебеларускага турнэ музыканта, арганізаванага кампаніяй “Будзьма!”.
Мерапрыемства сабрала больш за сотню гледачоў з Маладэчна і бліжэйшых вёсак і гарадоў - Краснага, Аляхновічаў, Ашмянаў, Залесся.
Зміцер выконваў творы з розных альбомаў і на розных мовах. Гучалі песні на вершы Някляева, Броўкі, Барадуліна, Маякоўскага і іншых выбітных паэтаў. Многія песні Зміцер спяваў разам з усёй залай.
Гледачы доўга не жадалі развітвацца з артыстам, выклікалі на “біс” – канцэрт доўжыўся больш за дзьве гадзіны.

Прыпынак “Дзіцячы свет” стане прыпынкам “Гіпа”?

Сакавік 2, 2009, Ул. інф.

У будынку былога “Дзіцячага свету” нарэшце адкрыўся новы “супермаркет”– “Гиппо”.
У першыя дні працы крамы назіральнікаў было значна больш, чым пакупнікоў.
Што прыемнае – кошты многіх тавараў сапраўды ніжэйшыя, чым у звычайных крамах. Добры (зноў жа, з “маладэчанскага” пункту гледжання) асартымент. На другім паверсе – вялікі аддзел дзіцячых тавараў, асабліва актуальны для нашага горада, у якім не існуе дзіцячых крамаў.
Мінусы – у двухпавярховасці крамы (вазок для тавараў на другі паверх не завязеш), а таксама – у адсутнасці паркінга. Гэтыя акалічнасці супярэчаць галоўнаму супермаркетнаму прынцыпу – закупкі вялікімі аб’ёмамі. У руках многа не ўнясеш.
Да таго ж беларускія супермаркеты не прадугледжваюць зніжак за вялікую колькасць пакупак.

“Рок-Каранацыя” – ў Маладэчна

Люты 24, 2009, Ул.інф.

Першы раз за сваю 14-гадовую гісторыю, фестываль пройдзе не ў сталіцы. Наш горад прыме “Рок-каранацыю” 14 сакавіка ў Палацы культуры.
На ўдзел у мерапрыемстве ўжо далі папярэднюю згоду гурты “Ляпіс Трубяцкой”, “Троіца”, “Безбілета”, IQ48, “Детидетей”, “Садъ”, “Князь Вітаўт” і інш.
Цырымонію адкрые “Neuro Dubel”, уладальнік галоўнай Рок-Кароны 2007 г.
Таксама ўдзел прыме сімфанічны аркестар музычнай вучэльні Маладэчна. У суправаджэнні аркестра рок-музыкі сыграюць па адной песні.
Пераможцы будуць вызначаныя ў намінацыях: “Альбом году”, “Песня году”, “Кліп году”, “Выканаўца году”, “Традыцыі і сучаснасць”, “Рок-князёўна” і “Рок-Карона”.
Па словах арганізатараў, у гэтым годзе апошні раз фестываль будзе называцца “Рок-каранацыя”. У далейшым, хутчэй за ўсё, ён стане проста “Каранацыяй”.

Лес – наша багацце. Мяса і масла – наш заробак.

Люты 20, 2009, Ул. інф.

Цяжкія часы насталі для аднаго з самых, здавалася, стабільных прадпрыемстваў нашага горада – Маладэчанскага лясгаса.
У лютым-месяцы працаўнікі вымушаныя браць па тыдню адпачынку “за свой кошт”. У сакавіку будуць працаваць па 4 дні на тыдзень.
А студзеньскі заробак працаўнікам лясгаса часткова выдавалі “натурай”: мясам, каўбасамі, маслам, сырам, глазураванымі сыркамі і мукой. Кошты на прапанаваныя прадукты былі, як у крамах.

Вып’ем за любоў

Люты 14, 2009, Ул.інф.

Маладэчна святкуе Дзень закаханых. Тым, хто загадзя не запасся спіртным ці не замовіў столік у кавярні, застаецца быць п’янымі толькі каханнем…

Маладэчна гатовы

Снежань 31, 2008, Ул. інф.

Маладэчна гатовы да сустрэчы Новага года. На Цэнтральнай плошчы і ў кожным мікрараёне стаяць навагоднія елкі. Але настрой маладэчанцаў напярэдадні свята быў крыху сапсаваны паведамленнямі аб тым, што з’яўляцца ў нецвярозым стане навагодняй ноччу ў грамадскіх месцах забаронена. Нельга будзе нават прынесці з сабой “пад ёлку” спіртное і “падазроныя рэчы” (асабліва пільнымі раім быць з сокам “Садочак”).
Відавочна, святочны настрой у цвярозых маладэчанцаў павінен з’явіцца ў 1.30 на Цэнтральнай плошчы, калі адбудзецца феерверк, на які было выдаткавана 10 мільёнаў рублёў.

Новы “супермаркет”

Снежань 22, 2008, Ул. інф.

Адкрыцця “супермаркета” на месцы былога “пятнаццатага магазіна” па вуліцы Прытыцкага маладэчанцы чакалі ўжо даўно. І месца вельмі зручнае, цэнтр горада, і звонку новы будынак выглядаў вельмі прывабліва. Нарэшце на мінулым тыдні на вітрыне крамы “Добродар” з’явіўся надпіс “Мы открылись”.  >>

Маладэчаншчына для турыстаў

Лістапад 17, 2008, Ул. інф.

У нядзелю 16 лістапада ў музеі вёскі Плябань Маладэчанскага раёна адбыліся гісторыка-краязнаўчыя чытанні “Маладэчна і ваколіцы: гісторыя, стан вывучэння, перспектывы турыстычнага асваення”.
Арганізавалі гэтае мерапрыемства Беларускае добраахвотнае таварыства аховы помнікаў гісторыі і культуры, Моладзевая ініцыятыва аднаўлення могілак і Філіял Мінскага абласнога краязнаўчага музея ў в. Плябань, у рамках агульнанацыянальнай грамадскай кампаніі “Будзьма!”.
Мерапрыемства сабрала неабыякавых грамадскіх актывістаў, краязнаўцаў, мясцовых жыхароў. Таксама прысутнічалі прадстаўнікі аддзелаў культуры і ідэалогіі Маладэчанскага райвыканкама.  >>

« Папярэдняя старонка — Наступная старонка »